San Ildefontso taldea 1623. urtean aurkitu zuten, Erroman, eta ehun urte geroago La Granja de San Ildefonsora eraman zuten.

Eskulturak Orestes eta Pilades irudikatzen ditu, adiskidetasunaren eredu ospetsuak. Sakrifizio bat eskaintzen ari dira, Tauridetik Artemisiaren irudiarekin (alboan duten estatuatxoa) itzuli izanagatik. Ekintza horri esker, Orestes libratu egin zen Jainkoak ezarritako zigorretik. Beste batzuen iritzian, baina, Kastor eta Polux anaiak dira eskultura honetako irudiak.

Aro modernoan, Antinooren erretratu erromatarra erantsi zioten ezkerreko soinari. Augustoren garaiko klasizismoko talde eskultoriko hau, garai hartako eklektizismoaren isla bikaina da.

Talde honi buruzko lehen berriak 1623koak dira. Erromako Villa Ludovisin zegoen aldi hartan, Massimi kardinalaren jabetzapean. Elizgizona hil ostean, Suediako Kristinaren bildumako zati izatera pasatu zen eta, ondoren, Espainiako lehen Errege borboiarenera; hots, Filipe V.arenera (1683-1746).